Mkuu wa Magereza wa Mkoa wa Mwanza SACP Justine Kaziulaya ameipongeza kampuni ya Jambo Group kwa udhamini na uwezeshaji wa maonesho ya Wakandarasi,wahandisi na Sekta ya Ujenzi Tanzania yanayoendelea katika viwanja vya EPZA Bombambili halmashauri ya Mji Geita yaliyokutanisha makampuni zaidi ya 50 kutoka sehemu mbalimbali duniani.
Ametoa pongezi hizo wakati akizungumza na Jambo Fm mara baada ya kutembelea na kujionea namna maonesho hayo yanavyoendelea na kueleza kwamba uamuzi wa kampuni ya Jambo Group kudhamini ni kujitoa kwa kiasi kikubwa katika uwezeshaji wa jamii nzima kukua kiuchumi kutokana na elimu na ujuzi unaotolewa kupitia maonesho husika.
Ametumia nafasi hiyo kuwataka wakazi wa kanda ya ziwa na mikoa jirani kujitokeza katika maonesho hayo ili kujionea na kupata elimu kutoka kwa kampuni za ndani na nje ya Tanzania hasa teknolojia mpya ya masuala ya uhandisi ujenzi na mambo mengine.
“Ni aghalabu kukuta bidhaa mbalimbali na waoneshaji mbalimbali wako kwenye eneo moja mahali ambapo ungetumia gharama kubwa kuja kupata uzoefu,sasa kama jeshi la Magereza kupitia maonesho haya wataalam wetu wataweza kuongea na wataalamu wengine kuweza kujua kuna nini kwenye soko katika masuala mazima ya kitaalam kwasababu tafiti zinafanywa kila siku”Amesema SACP Kaziulaya.
