Na Cecilia Shiratu, Bhiharamulo – Kagera.

Mkuu wa Wilaya ya Biharamulo, SACP Advera Bulimba, amewataka Viongozi na Madiwani kuendelea kusimamia na kulinda miradi ya maendeleo inayotekelezwa wilayani humo ili ikamilike kwa wakati na kwa viwango vinavyohitajika. 

SACP Bulimba ametoa wito huo wakati akizungumza katika kikao cha Baraza la Madiwani cha robo ya nne ya mwaka wa fedha 2025/2026, kilichofanyika ikiwa ni kikao cha mwisho cha mwaka huo wa fedha. 

Aidha, amewataka madiwani kuhakikisha wanatetea maslahi ya wataalamu wanaofanya kazi katika ngazi ya kata, ili waweze kutekeleza majukumu yao kwa ufanisi na kupata stahiki zao kwa wakati. 

Katika hatua nyingine, Mkuu huyo wa Wilaya amewataka Waheshimiwa Madiwani kujitokeza kwa wingi kuupokea Mwenge wa Uhuru utakaowasili wilayani Biharamulo, pamoja na kuhamasisha wananchi kushiriki kwa wingi katika shughuli za mapokezi na mkesha wa Mwenge huo unaotarajiwa kufanyika Septemba 6, 2026. 

Amesisitiza kuwa ushiriki wa viongozi na wananchi ni muhimu katika kuonyesha mshikamano na kuunga mkono shughuli za maendeleo zinazotekelezwa kupitia ziara ya Mwenge wa Uhuru. Kikao hicho cha Baraza la Madiwani kimefanyika baada ya kukamilika kwa mwaka wa fedha 2025/2026 uliomalizika Julai 30, 2026.