Na Eunice Kanumba – Shinyanga.

Mkuu wa Mkoa wa Shinyanga, Mboni Mhita amekutana na kufanya mazungumzo na Wajumbe wa Jumuiya ya  Maridhiano na Amani Mkoani humo, waliomtembelea ofisini kwake kwa lengo la kumkaribisha pamoja na kujitambulisha kama wadau wa kudumisha amani na mshikamano katika jamii.

Akizungumza katika kikao hicho, RC Mboni ameipongeza jumuiya hiyo kwa kazi kubwa wanayoifanya ya kuhakikisha kunakuwepo na utulivu, mshikamano, uvumilivu wa kidini na kijamii, na kuwaahidi ushirikiano wa karibu katika kufanikisha dhamira ya serikali ya kudumisha amani na maendeleo kwa wote.

Amesema, “amani ni msingi wa kila kitu  maendeleo, uwekezaji, elimu na hata ustawi wa jamii. Nafurahi sana kuona Kamati hii ipo hai na inaendelea kufanya kazi kwa uzalendo mkubwa. Serikali ipo tayari kushirikiana nanyi bega kwa bega.”

RC Mboni ameongeza kuwa, Ofisi yake itaendelea kushirikiana na kamati hiyo katika kuhakikisha Amani inakuwepo Katika mkoa huo kabla na baada ya Uchaguzi Mkuu unaotarajiwa kufanyika Octoba 29 Mwaka huu.

Kwa upande wao, Wajumbe wa Kamati hiyo wakiongozwa na Mwenyekiti wao, Sheikh Balilusa Khamis wamempongeza kwa kuteuliwa kuwa Mkuu wa Mkoa wa Shinyanga na kumhakikishia kuwa wapo ⁹tayari kuendelea kuwa chombo cha mshikamano, maridhiano na mawasiliano kati ya serikali na jamii, ili kulinda misingi ya amani mkoani humo.

Aidha, wamemuomba Mkuu huyo wa Mkoa kuendelea kuwapa nafasi ya kushirikiana na taasisi nyingine na kutoa elimu kuhusu masuala ya utatuzi wa migogoro, uvumilivu wa kidini, na kukuza maelewano katika maeneo yenye changamoto mbalimbali.

Mkutano huo ni ishara ya mshikamano uliopo baina ya Serikali na wadau wa amani, huku ukisisitiza wajibu wa kila mmoja katika kulinda tunu hiyo ya Taifa.