Bodi ya Tumbaku Tanzania (TTB) imefuta leseni za ununuzi wa tumbaku kwa kampuni nane (8) baada ya kushindwa kukidhi vigezo na masharti yaliyowekwa kwa ajili ya kununua zao hilo kutoka kwa wakulima.
TTB imesema hatua hiyo imelenga kulinda maslahi ya wakulima wa tumbaku na kuhakikisha kampuni zinazoshiriki katika biashara ya ununuzi wa zao hilo zinazingatia sheria, kanuni na masharti ya leseni.
Kwa mujibu wa TTB, hadi sasa leseni zimetolewa kwa kampuni 16 kati ya kampuni 24 zilizokuwa zimeingia mikataba ya kuzalisha tumbaku na wakulima, baada ya kampuni hizo kukidhi vigezo vinavyotakiwa.
Bodi hiyo imeeleza kuwa kampuni zote zilizopewa leseni ndizo pekee zinaruhusiwa kununua tumbaku kutoka kwa wakulima katika msimu wa 2026/27, huku zikitakiwa kuhakikisha malipo kwa wakulima yanafanyika ndani ya muda uliowekwa kisheria.
TTB imebainisha kuwa inaendelea kufuatilia mwenendo wa malipo kwa wakulima na imewataka wakulima pamoja na wadau wengine kutoa taarifa kuhusu changamoto zozote zinazohusiana na malipo ili hatua stahiki ziweze kuchukuliwa.
Aidha, bodi hiyo imewahakikishia wakulima waliokuwa na mikataba na kampuni zilizofutiwa leseni kuwa jitihada zinaendelea kuhakikisha tumbaku yao inanunuliwa na wanunuzi wengine wenye sifa na leseni halali.
Wakati huo huo, TTB imetoa onyo kwa kampuni zote zilizopewa leseni kuwa haitasita kusimamisha au kufuta leseni zao endapo itabainika kuwa zinakiuka masharti ya leseni, ikiwemo kushindwa kuwalipa wakulima kwa wakati kama inavyoelekezwa na kanuni za zao la tumbaku.
Hatua hiyo inaonyesha dhamira ya TTB ya kuimarisha uwajibikaji katika sekta ya tumbaku na kuhakikisha wakulima wanapata stahiki zao kwa wakati pamoja na kulindwa dhidi ya changamoto zinazoweza kujitokeza katika soko la zao hilo.
Discussion
Reader comments
0 contributions