Timu ya Maafa kutoka Ofisi ya Waziri Mkuu imeridhishwa na hatua zinazochukuliwa na Mkoa wa Kagera kujiandaa kukabiliana na mvua kubwa za El Nino zinazotarajiwa kunyesha katika kipindi hiki.
Timu hiyo imesema maandalizi hayo ni muhimu katika kupunguza madhara yanayoweza kusababishwa na mvua hizo, ikiwemo mafuriko, uharibifu wa miundombinu na athari kwa makazi ya wananchi.
Mkurugenzi Msaidizi katika Ofisi ya Waziri Mkuu, Sera, Bunge na Uratibu pamoja na Watu wenye Ulemavu, Linah Kitosi, amesema hayo wakati wa ziara ya kutathmini utayari wa Mkoa wa Kagera katika kukabiliana na athari za mvua hizo.
Bi. Kitosi amesema hayo katika ziara hiyo ya ukaguzi wa maeneo mbalimbali, yakiwemo barabara, makazi ya wananchi pamoja na mialo ya wavuvi, ili kubaini kiwango cha maandalizi na changamoto zinazoweza kujitokeza.
Hata hivyo, ameshauri kukamilishwa kwa haraka kwa shughuli za uzibuji wa madaraja na mitaro katika maeneo ya makazi, hatua ambayo amesema itasaidia kurahisisha upitishaji wa maji ya mvua na kupunguza uwezekano wa mafuriko.
Hatua hizo zinapaswa kupewa kipaumbele, hasa katika maeneo ambayo tayari yameainishwa kuwa katika hatari ya kuathiriwa na mvua kubwa, huku akisisitiza umuhimu wa ushirikiano kati ya mamlaka na wananchi.
Kwa upande wake, Mkuu wa Mkoa wa Kagera, Kanali Yahaya Ramadhani Kido, amesema utekelezaji wa hatua za maandalizi unaendelea katika maeneo mbalimbali ya mkoa, ikiwa ni pamoja na kuchukua hatua za kupunguza hatari zinazoweza kusababishwa na mvua hizo.
Kanali Kido amesema mkoa utaendelea kushirikiana na taasisi mbalimbali kuhakikisha wananchi wanafikiwa na taarifa na tahadhari muhimu, pamoja na kuchukua hatua zinazolenga kulinda maisha ya watu na mali zao.
Discussion
Reader comments
0 contributions