TANAPA YAANZA KUTUMIA AI KUVUTIA WATALI HIFADHI YA GOMBE

Katika kuendana na kasi ya maendeleo ya Sayansi na Teknolojia duniani, Shirika la Hifadhi za Taifa Tanzania (TANAPA) limeanza kutumia teknolojia ya Akili Mnemba (Artificial Intelligence - AI) ili kutambua mahitaji ya soko la utalii duniani na kubuni mikakati ya kuvutia watalii kutembelea vivutio mbalimbali vya utalii vilivyopo nchini.

Hayo yalisemwa na Kamishna Msaidizi wa Uhifadhi ambaye pia ni Mkuu wa Kitengo cha Maendeleo ya Biashara kinachosimamia Utalii na Masoko katika TANAPA, July Lyimo, wakati wa maadhimisho ya Siku ya Utalii Duniani yaliyofanyika katika Hifadhi ya Taifa ya Gombe mkoani Kigoma.

Lyimo alisema matumizi ya Akili Mnemba katika sekta ya utalii duniani yamekuwa na umuhimu mkubwa kutokana na uwezo wake wa kuchambua taarifa za masoko na kubaini mahitaji ya watalii kutoka maeneo mbalimbali duniani, jambo linalosaidia taasisi kupanga mikakati bora ya kutangaza vivutio vya utalii.

Kwa upande wake, Kamishna Msaidizi wa Uhifadhi na Mkuu wa Hifadhi ya Taifa ya Gombe, Kelvin Taitus Nkulila, amesema TANAPA imeendelea kuweka mikakati mbalimbali ya kuhifadhi na kulinda sokwe, ambao ni miongoni mwa wanyama waliopo katika hatari ya kutoweka duniani.

Alisema hatua zinazochukuliwa ni pamoja na kufuatilia afya na magonjwa yanayoweza kuwaathiri sokwe, pamoja na kuimarisha doria za kupambana na uwindaji haramu ili kuhakikisha wanyama hao wanaendelea kuwepo kwa vizazi vijavyo.

Baadhi ya wadau wa sekta ya utalii walioshiriki maadhimisho hayo walisema kuwa idadi ya Watanzania wanaojihusisha na utalii wa ndani imeongezeka katika miaka ya karibuni, jambo linalochangia kukuza uchumi na kuongeza uelewa kuhusu rasilimali za taifa.

Aidha waliwataka wananchi kuendelea kutembelea hifadhi za taifa na kujionea vivutio vya kipekee vilivyopo nchini, ikiwemo sokwe wa Hifadhi ya Taifa ya Gombe, ambao tafiti zinaonesha kuwa tabia na mfumo wao wa kimaumbile vinafanana kwa kiwango kikubwa na binadamu.

Maadhimisho ya Siku ya Utalii Duniani mwaka 2026 yameongozwa na kaulimbiu inayohamasisha matumizi ya teknolojia za kidijitali katika kuendeleza sekta ya utalii, huku Akili Mnemba ikitajwa kuwa miongoni mwa nyenzo muhimu zitakazosaidia kubuni na kuimarisha huduma za utalii nchini.