MRADI WA MALEZI, MAKUZI YA MTOTO WAZINDULIWA SHINYANGA

Na Eunice Kanumba – Shinyanga.

Katibu tawala   mkoa wa Shinyanga CP Salum Hamduni  leo ,amezindua rasmi mradi wa malezi na makuzi ya mtoto unaotekelezwa na kanisa la Anglikana Tanzania dayosisi ya Shinyanga  wenye lengo la kuboresha maendeleo ya awali ya ukuaji wa mtoto kupitia malezi bora,ushiriki wa jamii na kuimarisha ustawi  wa uchumi wa kaya.

Akizungumza katika uzinduzi  wa mradi huo CP Hamdun amesema  ustawi wa mtoto katika umri kuanzia o mpaka miaka 3 ni jambo la msingi Katika kujenga taifa lenye rasilimali watu bora  na kuwataka wazazi na walezi kuwalea watoto katika mazingira bora na salama ya kujifunza.

“Kupitia mradi huu tunatarajia kuona  ongezeko la uelewa wa wazazi na walezi kuhusu malezi bora kwa watoto ikiwa  ni pamoja na kuboreshwa kwa afya na  lishe  ya watoto kuimarika katika mkoa wa Shinyanga,“ amesema CP Hamduni.

Amesema  mradi huo unakwenda sambamba  na jitihada za serikali ya awamu ya sita  katika kuboresha huduma za awali za maendeleo ya mtoto kwa kuhakikisha watoto wanapata huduma za afya na lishe bora  kwa kuzingatia ustawi wa afya ya mwili na akili pia.

Kwa upande wake askofu wa kanisa la anglikana Tanzania dayosisi ya Shinyanga Johnson Chinyong’ole  mradi huo utatekelezwa katikahalimashuri ya wilaya ya Kishapu katika vijiji vya Mayanji,Bulimba,Mwaweja  na Negezi na kwamba utekelezaji wa mradi huo  ni agizo la Mungu  kwani  Yesu alisema amekuja duniani ili watu wawe na uzima tele hivyo uzima ni pamoja na ustawi wa afya njema.

Askofu Chinyong’ole amesema mradi huo unaenda kutekelezwa kwa   kushirikiana na jamii pamoja na wadau mbalimbali wa masuala ya afya ili kuendelea kuongeza uelewa  kuhusu malezi mazuri ya watoto pamoja na haki zao ili kuboresha mazingira ya ukuaji.

Naye mganga mkuu mkoa wa Shinyanga  Dr Honaratha Rutatinisibwa  amesema kupitia mradi huo jamii inakwenda kujengewa uelewa mkubwa kuhusiana na malezi ya mtoto  na kwamba utakwenda kupunguza tatizo la udumavu  pamoja na kupambana na vitendo vya ukatili kwa watoto.

Uzinduzi wa mradi huo umehudhuriwa na wadau mbalimbali wa maendeleo, afya na makuzi ya mtoto   na unatajwa kuwa chachu ya kuongeza uelewa wa malezi bora na  yenye usatwi kwa mtoto katika jamii.