MAFUNDI UJENZI WASISITIZWA KUWA WAMOJA ILI KULINDA HAKI ZAO

Na Eunice Kanumba – Shinyanga.

Waziri wa Mambo ya Ndani ya Nchi, Patrobas Katambi amewataka  mafundi ujenzi waweke makubaliano ya kazi hata ikitokea changamoto  katika utendaji na kushitakiana, ili iwe rahisi kupata haki, kwa kujenga umoja na mshikamano miongoni mwao,.

Pia mewasisitiza kutumia vifaa  vya usalama  kazini, kama mavazi ya kiufundi na viatu kwani wengi wao huingia kwenye changamoto zikiwemo za afya na kiusalama kwa kutokutumia vifaa hivyo.

Katambi  ambaye ni Mbunge wa Jimbo la Shinyanga Mjini, ameyasema hayo  kwenye semina ya mafundi ujenzi mkoa wa Shinyanga, iliyoandaliwa na Kampuni ya Magic Builders  kwa kuwakutanisha mafundi ujenzi  zaidi ya 600.

Amesema, Serikali imechukua jukumu la kuanza kuwatambua mafundi ujenzi na kutaka kuwarasimisha  kwa kuwapatia vyeti kupitia chuo cha ufundi stand (VETA) na kwamba  kumekuwepo changamoto ya mafundi ujenzi kutopewa kipaumbele na jamii zinazowazunguka na hata inapotokea changamoto ikayopelekea mashitaka  katika vyombo vya kisheria wengi hukosa vielelezo vya ushahidi.

 "Ufundi salama  na ufundi wa ujenzi wenye ujuzi  ndiyo unatakiwa na  mjithamini  kulinda uhai na afya zenu mnapokuwa kazini hakikisheni mnavaa vifaa vya usalama ikiwemo  kofia ngumu inaepusha hata ukipata majanga ya kuchomwa na msumari,” amesema Katambi. 

Katika hatua nyingine pia amewataka mafundi  ujenzi kote nchini kuendelea kuilinda amani ya nchi kwani hata ikitokea vurugu kamwe hawawezi kufanya kazi, hivyo wasikubali kuungana na watu wanaowadanganya na kuwashawishi kufanya vurugu za kuandamana  kupitia mitandao ya kijamii.

Naye Mkurugenzi wa Kampuni ya Magic Builders, David Barongo amesema, mafundi ujenzi walikuwa wamesahaulika  ingawa wamekuwa na ujuzi na maarifa  na wakitaka kazi mpaka wajieleze  na sasa kampuni hiyo imeingia  ushirikiano na chuo cha veta  kwenda kuwarasmisha mafundi 700,000 nchi nzima.

"Mafundi hawa hawatatoa hata shilingi moja   fedha zote zitalipwa na kampuni  tumekuwa na programu nyingi  lakini haziwalengi mafundi ujenzi  tukiwakumbuka wataendelea kutambulisha bidhaa zetu za ujenzi zilizopo sokoni hivi sasa," amesema Barongo.

Kwa upande wake Kaimu Meneja wa Chuo cha Ufundi (VETA), Rashid  Ntahigiye amesema  zoezi la kurasimisha makundi mbalimbali  lilianza mwaka 2017, hivyo mafundi hao  wataanza kurasmishwa na kupatiwa vyeti kwa lengo la utambuzi wa maarifa na ujuzi walioupata nje ya mfumo rasmi.

Naye Kamanda wa Polisi mkoa wa Shinyanga, Janeth Magomi amesema, mafundi ujenzi bado ni Vijana hivyo wanatakiwa wafanye kazi zilizo na faida sio hasara, huku akiwahamasisha  kutojiingiza kwenye makundi  na kutumika kama hasara ya kuhalibu mali na kukubali kutawaliwa  na mamlaka zilizopo, ili waendelee kuwa na maadali.

Baadhi ya mafundi ujenzi akiwemo Emanuel  Stephano na Eliud Makala kwa nyakati tofauti wameiambia Jambo Media kuwa elimu iliyotolewa itawasaidia  changamoto ya kutoandikishana makubaliano na kudhulumika na kuwasisitiza juu ya uvaaji mavazi maalum ya ufundi  na kutotumia vilevi, ili kulinda afya zao.