KIKOSI KAZI KUPAMBANA USAFIRISHAJI HARAMU WA BINADAMU CHAUNDWA SHINYANGA

Na Eunice Kanumba – Shinyanga.

Wadau mbalimbali  mkoani Shinyanga,  wameunda kikosi kazi cha kupambana na usafirishaji  haramu wa binadamu ( ATS) na kuandaa mpango kazi kwa kipindi cha mwaka  mmoja, ambao utajumuisha utoaji wa elimu kwenye jamii wakilenga kudhibiti usafirishaji huo.

Mrakibu Mwandamizi  wa Uhamiaji Mkoa wa Shinyanga Issa Kisiroti ambaye amechaguliwa kuwa mwenyekiti wa kikosi kazi hicho  amesema, mpango kazi huo umeanza rasmi Septemba 2026, ukiwa na madhumuni  ya ushirikiano  katika kupambana na usafirishaji  haramu wa binadamu , ambao ni kosa linalovuka mipaka.

"Manusura  wakubwa wa usafirishaji haramu wa binadamu ni makundi ya wasichana na watoto wadogo  ambao wanatumiwa kwa njia ya udanganyifu kwa lengo la  wanaowatumia  kujinufaisha kwa kujipatia fedha hivyo kwa kushirikiana tutaweza kutokomeza," amesema Kisiroti.

Kwa upande wake Afisa Ustawi wa Jamii Mkoa wa Shinyanga, Lyidia Kwesigabo (Katibu wa Kikosi Kazi) amesema, wamejengewa uwezo wa kupambana na usafirishaji haramu wa binadamu kwa lengo la kutengeneza mpango kazi .

Naye Mwajuma Ally kutoka shirika la Community of Volunteers  for the  World (CVM) kupitia Mradi wa emPoWeReD  II wa  kushirikiana  na Apartnership with Africa (APA) na Wizara ya Mambo ya  Ndani kupitia Sekretarieti ya kupinga usafirishaji haramu wa binadamu (ATS), amesema wameamua kuunda kikosi kazi, ili kutokomeza biashara hiyo.

"Tumefanya makubaliano na kuunda kikosi kazi cha mkoa wa Shinyanga  ambacho kinakwenda kutoa  elimu ya uelewa maeneo mbalimbali ikiwemo shuleni na kwenye jamii  pia tumekuwa tukishirikiana na  Chama Cha Wafanyakazi wa Hifadhi ,Hoteli,Majumbani, na Huduma  za  jamii na Ushauri  (CHODAWU ) nakutoa elimu kwa wasichana wa kazi za nyumbani," amesema  Mwajuma.

Ameongeza kuwa, kikosi kazi kitaenda kushirikiana  kwa pamoja katika kutoa elimu kwa jamii,kutambua viashiria vya usafirishaji  haramu wa binadamu,kuzuia  na kuwasaidia  manusura  kupata msaada stahiki  .

Kikosi kazi kilichoundwa, kinajumuisha wadau mbalimbali ikiwemo  Afisa Uhamiaji, Jeshi la Polisi, Mwendesha Mashtaka, Hakimu Mkazi, Ustawi wa jamii, Maendeleo ya jamii, Mganga Mkuu wa Mkoa, Afisa kazi, Kiongozi wa Dini na Mwandishi  wa Habari.