Halmashauri ya Wilaya ya Buhigwe Mkoani Kigoma imezindua kampeni ya usafi katika maeneo mbalimbali ya barabara, masoko na makazi ya wananchi, ikiwa ni mkakati wa kuzuia maafa pamoja na athari zinazoweza kusababishwa na mvua za El-Nino.
Zoezi hilo limezinduliwa katika Kata ya Mnanila, Wilaya ya Buhigwe, na kuongozwa na Mkurugenzi wa Halmashauri ya Wilaya hiyo, George Mbilinyi, ambaye alisisitiza umuhimu wa kila kaya kuwa na utaratibu wa kufanya usafi mara kwa mara katika maeneo yao.
Akizungumza wakati wa zoezi hilo, Mbilinyi alitoa wito kwa wananchi kuendelea kushirikiana katika kuhakikisha mazingira yanakuwa safi na salama, hususan katika kipindi cha mvua, ili kupunguza uwezekano wa kutokea kwa mafuriko na magonjwa yanayoweza kusababishwa na uchafu wa mazingira.
Kwa upande wao, viongozi mbalimbali walioshiriki katika kampeni hiyo, akiwemo Afisa Maendeleo ya Jamii Mkoa wa Kigoma, Msafiri Nzunuri, pamoja na Mkuu wa Kituo cha Polisi Manyovu, CP Abdul Mstapha, wamewataka wananchi kutambua kuwa jukumu la kuweka mazingira safi na salama ni la kila raia.
Viongozi hao walisema ushirikiano wa wananchi katika usafi wa mazingira ni muhimu katika kuzuia na kudhibiti magonjwa ya mlipuko, hasa wakati wa msimu wa mvua.
Wananchi walioshiriki katika zoezi hilo wamepongeza hatua iliyochukuliwa na viongozi ya kuwa mstari wa mbele katika kuhamasisha usafi wa mazingira.
Aidha, waliiomba Halmashauri kutoa kipaumbele kwa maeneo yenye changamoto ya miundombinu, hususan barabara na maeneo mengine ambayo huwa magumu kupitika wakati wa msimu wa masika, ili yafanyiwe ukarabati kwa wakati.
Discussion
Reader comments
0 contributions