ASILIMIA 80 YA VIFO VYA WATOTO VINAWEZA KUEPUKIKA - DKT. THEOPISTA

Rais wa Chama cha Madaktari wa Watoto Tanzania, Dkt. Theopista Jacob, amesema asilimia 80 ya vifo vya watoto vinaweza kuepukika iwapo serikali na wadau wa afya wataboresha mfumo wa utoaji wa huduma za afya za watoto nchini.

Akizungumza wakati wa zoezi la kutoa huduma za afya, Dkt. Jacob amesema vifo vingi vya watoto vinatokana na magonjwa yanayoweza kuzuilika na kutibika ikiwemo malaria, pneumonia na kuhara. Amesisitiza kuwa upungufu wa vifaa tiba, dawa na ufuatiliaji duni hospitalini ndio unaochangia vifo hivyo kuendelea.

Kwa mujibu wa Dkt. Jacob, kuboresha mfumo wa utoaji huduma, kuongeza elimu kwa wazazi na kuhakikisha upatikanaji wa matibabu mapema kunaweza kupunguza kwa kiasi kikubwa vifo vya watoto. Amesisitiza pia umuhimu wa kuwa na ufuatiliaji wa karibu katika vituo vya afya ili watoto wapate matibabu kwa wakati.

Dkt. Jacob ameomba serikali na wadau mbalimbali wa afya kushirikiana kuhakikisha hakuna mtoto anapoteza maisha kwa sababu ya magonjwa yanayoweza kuzuilika, na kusema kuwa afya ya mtoto ni msingi wa maendeleo ya taifa.