ALAT KATAVI YARIDHISHWA NA ZOEZI UHAMISHAJI WANANCHI LUHAFWE KWENDA IGALUKILO

Na Daniel Gahu - Katavi.

Kufuatia malalamiko ya uvunjifu wa haki za binadamu wakati wa zoezi la uhamishwaji wa wananchi, Kamati ya Chama cha Serikali za Mitaa Tanzania (ALAT) Mkoa wa Katavi imesema imeridhishwa na namna Serikali inavyotekeleza zoezi la uhamishaji wa wananchi 648 waliokuwa wakiishi katika eneo la uwekezaji la Western Luhafwe kwenda Mji Mpya wa Igalukilo uliopo Wilaya ya Tanganyika.

Uhamishaji huo unatekelezwa kufuatia maamuzi ya Baraza la Mawaziri yaliyolenga kupisha shughuli za uwekezaji katika eneo la Western Luhafwe, huku Serikali ikisisitiza kuwa wananchi wanaohamishwa wanapatiwa makazi mbadala pamoja na huduma muhimu za kijamii ili kuhakikisha maisha yao yanaendelea katika mazingira bora.

Akizungumza na waandishi wa habari mara baada ya kukagua maendeleo ya Mji Mpya wa Igalukilo, Mwenyekiti wa Kamati ya ALAT Mkoa wa Katavi, Hamad Mapengo, amesema kamati hiyo imejionea hatua mbalimbali zilizofikiwa katika maandalizi ya makazi hayo mapya na kuridhishwa na utekelezaji wa mpango huo.

Mapengo amesema Serikali tayari imeanza kujenga miundombinu muhimu itakayowawezesha wananchi kupata huduma za msingi mara watakapohamia rasmi katika eneo hilo. Amebainisha kuwa miundombinu inayotekelezwa ni pamoja na ujenzi wa zahanati, shule pamoja na huduma ya maji safi na salama, ambayo ni miongoni mwa mahitaji muhimu kwa maendeleo ya jamii.

Aidha, amesema uwepo wa huduma hizo utasaidia kuhakikisha wananchi hawapati changamoto za kupata huduma za afya, elimu na maji baada ya kuhamia katika makazi mapya, huku akieleza kuwa Kamati ya ALAT itaendelea kufuatilia utekelezaji wa miradi hiyo hadi ikamilike.

Naye Mbunge wa Jimbo la Mpanda Mjini na Mjumbe wa Kamati ya ALAT Taifa, Haidary Hemmed Sumry, ameipongeza Halmashauri ya Wilaya ya Tanganyika kwa usimamizi wa zoezi hilo, akieleza kuwa eneo walilochaguliwa wananchi kuhamia linafaa kwa shughuli zao za kiuchumi.

Sumry amesema mazingira ya Mji Mpya wa Igalukilo yanatoa fursa nzuri kwa wananchi kuendelea na shughuli za kilimo na ufugaji ambazo ni tegemeo lao kuu la kiuchumi, jambo litakalowasaidia kuendelea kujiongezea kipato na kuboresha maisha yao hata baada ya kuondoka katika eneo la awali.

Kwa upande wake, Mkurugenzi Mtendaji wa Halmashauri ya Wilaya ya Tanganyika ambaye pia ni Katibu wa Kamati ya ALAT Mkoa wa Katavi, Shaban Juma, amesema Serikali imejipanga kuhakikisha kila mwananchi anayehamia katika makazi hayo mapya anapatiwa haki zake kwa usawa.

Amesema kila kaya itapatiwa kiwanja kwa ajili ya ujenzi wa nyumba pamoja na shamba lenye ukubwa wa hekari sita kwa ajili ya shughuli za kilimo, hatua inayolenga kuhakikisha wananchi wanaendelea kujitegemea kiuchumi na kuboresha ustawi wa familia zao.

Shaban Juma ameongeza kuwa ugawaji wa viwanja na mashamba utafanyika kwa uwazi, haki na usawa, huku Serikali ikiendelea kusimamia utekelezaji wa mpango huo ili kuhakikisha wananchi wote wanaostahili wanapata huduma na rasilimali walizoahidiwa.

Kwa ujumla, Kamati ya ALAT Mkoa wa Katavi imeeleza kuridhishwa na hatua zilizofikiwa katika utekelezaji wa mpango wa uhamishaji wa wananchi kutoka Western Luhafwe kwenda Mji Mpya wa Igalukilo, ikisema utekelezaji wa miundombinu ya kijamii pamoja na maandalizi ya maeneo ya makazi unaonesha dhamira ya Serikali ya kuhakikisha wananchi wanahamia katika mazingira salama, yenye huduma bora na yanayowawezesha kuendelea na shughuli zao za maendeleo.