Na Cecilia Shiratu, Biharamulo – Kagera.

Halmashauri ya Wilaya ya Biharamulo mkoani Kagera, imefanikiwa kuvuka lengo la ukusanyaji wa mapato kwa mwaka wa fedha 2025/2026, baada ya kukusanya zaidi ya shilingi bilioni 54.6 hadi Juni 30, 2026, sawa na asilimia 101.42 ya lengo lililowekwa. 

Hay9 yamebainika baada ya Mweka hazina wa Halmashauri ya wilaya Biharamulo, Maliki Makange, kusoma taarifa hiyo wakati  wa ufungaji wa hesabu za mwisho wa mwaka wa fedha 2025/2026, iliyowasilishwa kwa Mwenyekiti wa Baraza la Madiwani la Halmashauri hiyo.  

Alisema, Halmashauri ilikuwa imepanga kukusanya jumla ya shilingi 51,057,191,000, lakini hadi Juni 30, 2026 ilikuwa imekusanya shilingi 54,650,361,944. 

Makange alieleza kuwa, Mafanikio hayo yanaifanya Halmashauri hiyo kuvuka lengo lake kwa zaidi ya shilingi bilioni 3.5  ikiwa ni ongezeko la mapato ikilinganishwa na makadirio ya mwaka huo wa fedha. 

Katika mwaka wa fedha 2025/2026, Halmashauri ilikuwa na salio anzia la shilingi 5,197,104,278 na ilipanga kukusanya mapato ya shilingi 51,057,191,000. 

Aidha, katika kipindi hicho Halmashauri ilipanga kutumia jumla ya shilingi 51,057,191,000, ambapo hadi kufikia Juni 30, 2026, jumla ya shilingi 48,158,511,468 zilikuwa zimetumika, kwa mujibu wa taarifa hiyo. 

Makange pia alieleza kuwa, hadi Juni 30, 2026, Halmashauri ilikuwa na mali zenye thamani ya shilingi 51,633,341,075, huku ikiwa na madeni yenye thamani ya shilingi 4,639,101,887. 

Halmashauri ilikuwa na salio la fedha taslimu la shilingi 3,837,812,747 katika akaunti zake, zikiwemo akaunti za Makao Makuu, shule, kata na vijiji, pamoja na fedha za shughuli za utoaji huduma. 

Mafanikio hayo yanaonesha hatua iliyofikiwa na Halmashauri ya Wilaya ya Biharamulo katika usimamizi na ukusanyaji wa mapato, pamoja na utekelezaji wa shughuli mbalimbali za maendeleo na utoaji wa huduma kwa wananchi.